Published Thursday , on 21 March 2019, 21:23:34 by Igorora Iritararenga Dieudonne

Amnesty International, ishyirahamwe mpuzamahanga riharanira kurengera uburenganzira bwa muntu ryavuze ko hari ibimenyetso ko indege za gisirikare za Leta Zunze ubumwe za Amerika zishe zikanakomeretsa abantu batandukanye muri Somalia.

Iri shyirahamwe rirashinja abategetsi ba minisiteri y’ingabo ya Leta Zunze ubumwe za Amerika kudakora iperereza rihagije ku baturage ba Somaliya bahitanywe n’ibitero by’indege z’iki gihugu muri Somaliya.

Nk’uko tubikesha Radiyo ijwi rya Amerika, ngo abayobozi bakuru b’ibiro bya’ gisirikare bya Leta Zunze ubumwe za Amerika muri Afurika bizwi nka AFRICOM, bamaze gutera utwatsi ibirego bikubiye muri raporo ya Amnesty International bemeza ko igisirikare cya Leta zunze Ubumwe za Amerika bakoze iperereza.

Batanga urugero ko igisirikare cya Leta Zunze Ubumwe Za Amerika zakoze iperereza ku madosiye 18 z’abaturage b’abasivire bishwe kuva mu mwaka wa 2017.

Iyi raporo ishinja igisirikare cya Leta Zunze Ubumwe za Amerika kwica, yagiye ku mugaragaro ubwo umuyobozi mu bashinzwe iperereza wa Somaliya, atashatse ko izina rye ritangazwa, atangarije ko igitero cy’indege yitwara izwi nka drone, ya Leta Zunze Ubumwe za Amerika yahitanye umuturage w’umusivire kuri uyu wa mbere. Ibi kandi byashimangiwe n’abantu bari muri aka gace igitero cyabereyemo, bemeza ko ibivugwa ari byo.