Published Friday , on 7 June 2019, 11:43:27 by Igorora Iritararenga Dieudonne

Umuryango w’ubumwe bw’Afurika watangaje ko ubaye uhagaritse igihugu cya Sudan mu bikorwa byose byawo kugeza igihe hagiriyeho ubutegetsi bwa gisivili bw’inzibacyuho.

Nk’uko bigaragara mu itangazo ry’ishami rishinzwe amahoro n’umutekano ry’uyu muryango, riravuga ko ubu "ari bwo buryo bwonyine bwo kurangiza ikibazo kiri muri Sudani".

Ibi bije nyuma y’imyigaragambyo y’abaturage yatumye igisirikare gihirika ku butegetsi Perezida Omar Al-Bashir muri Mata uyu mwaka. Iyi myigaragambyo yarakomeje na nyuma yaho, bamagana ko ubutegetsi bwakomeza kuba mu maboko y’igisirikare.

Mu minsi ishize, abasirikare barashe abigaragambyaga aho bavuga ko hishwe bagenzi babo barenga 100, naho uruhande rw’ubutegetsi rukemeza ko abamaze kwicwa batarenga 61 i Khartoum mu murwa mukuru wa Sudani.

N’ubwo bimeze gutya, abasirikare bayoboye Sudan kugeza ubu bemeje ko hagiye kuba amatora.

Nk’uko BBC dukesha iyi nkuru yabyanditse, ngo abantu bitwaje intwaro bashyigikiye ubutegetsi bwa gisirikare bashinjwa kwica abantu, bari kuboneka ahantu hose, ibi bikaba biteye ubwoba abaturage n’abari gutabara inkomere.

Umuryango w’ubumwe bw’Afurika, ushinja ubwicanyi buri kubera muri Sudan, abashinzwe umutekano, wasabye ko hakorwa iperereza.

Ku ruhande rw’ishami rishinzwe amahoro n’umutekano muri uyu muryango bavuga ko umwanzuro wo guhagarika Sudani wemejwe n’abagize umuryango kandi uhita ujya mu bikorwa.

Iri shami rivuga kandi ko rishobora gufatira ibihano bamwe mu bagize inama ya gisirikare iyoboye Sudan by’inzibacyuho, nibananirwa guha ubutegetsi abasivili.