Yanditswe Tuesday , Tariki, 2 May 2017. saa 13:45:33 na Christophe Hitayezu

Ihuriro ry’amavuriro yigenga ritangaza ko abanyamuryango baryo batiteguye gushyira mu bikorwa icyemezo cy’Ikigo cy’Igihugu cy’Ubwishingizi mu Rwanda cya ’transfers’ no gusaba abarwayi kwiyishyurira amafaranga arenga ku biciro byagenwe n’iki kigo ubwacyo.

Ku wa 24 Mata, ni bwo Ikigo cy’Igihugu Gishinzwe ubwishingizi RSSB cyashyize ahagaragara itangazo rigaragaza ibiciro mu mavuriro ya Leta n’ayigenga mu byiciro byayo byose, ndetse n’amabwiriza mashya.

Iri tangazo rivuga ko umuntu ukoresha ubwishingizi bwa RSSB buzwi nka RAMA najya kwivuza mu mavuriro ya Leta no mu mavuriro yigenga ariko avura indwara rusange (General clinics) azajya yishyurirwa 85% na ho iki kigo cyo kikishyura 15% nk’uko bisanzwe.

Na ho ukeneye kujya kwa muganga w’indwara zikeneye impuguke (Specialized clinics) kugira ngo yishyurirwe nk’uko bisanzwe azajya abanza ahabwe urupapuro rumusabira ubuvuzi bwisumbuyeho (transfers), bitaba ibyo akiyishyurira ikiguzi kirenga ku cyagenwe.

Abaganga bigenga bavuga ko aya mabwiriza ya RSSB anyuranyije cyane n’ayashyizweho n’Inama Nkuru y’Igihugu igena imiterere n’imikorere y’ibigo by’ubwishingizi, ari na rwo rwego rushinzwe kugena amategeko n’amabwiriza ndetse n’ibiciro abishingizi n’abaganga bakurikiza.

Nk’uko ikinyamakuru Izuba Rirashe dukesha iyi nkuru gikomeza kibivuga, Dr Gatsinga Jean Dieudonné uhagarariye ivuriro ryigenga rya Polyclinique du Plateau akaba anahagarariye ihuriro ry’amavuriro yigenga mu Rwanda, avuga ko ibiciro ndetse n’amabwiriza ya RSSB batazayakurikiza ngo kuko ahonyora umurwayi akaba ananyuranye n’ayashyizweho n’urwego rubishinzwe.

Amateka y’uku kutumvikana…

Nk’uko bisobanurwa na Dr Gatsinga, ngo amavuriro yigenga amaze imyaka irenga 4 afite ibibazo by’ibiciro akoreraho bitajyanye n’imirimo ikorwa na serivisi aha abaturage.

Ibi byatumye habaho inyigo ngo harebwe amafaranga nyayo agenda kuri izo serivisi ndetse n’asabwa kugira ngo ubuvuzi bukomeze gutera imbere hanatangwa serivisi nziza.

Ngo nyuma yo gukora inyigo, yeretswe abishingizi ariko ntibayemera. Ngo ubuyobozi bw’igihugu bwahise butanga amafaranga maze sosiyete yigenga ikora indi nyigo na yo abishingizi barayanga ndetse hakorwa n’iya gatatu ku busabe bwa MINECOFIN, RDB na MINISANTE na bwo ntiyemerwa.

Rumaze kubura gica, Ibiro bya Minisitiri w’Intebe byashyizeho inama yo gukemura ibyo bibazo, rugizwe n’abahagarariye impande zose zirebwa. Uru rwego rurakora ndetse rufite ububasha bwo gushyiraho ibyemezo n’ibiciro bikubahirizwa.

Ibiciro iyi nama yari yemeje, byatangiye gukurikizwa muri Gashyantare uyu mwaka, n’ubwo hari hakirimo utuntu two gukosora tutaremereye, nk’indwara zibagiwe ku rutonde n’ibindi.

Dr Gatsinga avuga ko mu byo iyi nama yemeje nta bya transfers birimo, ko ari uburenganzira bw’umurwayi kujya kwivuza kwa muganga ashaka hanyuma umwishingizi wabyemeye akamwishyurira.

Yemeza ko ari uguhonyora uburenganzira bw’umurwayi ndetse no kwica amategeko n’amabwiriza nkana, ibintu avuga ko bo badashobora kubikurikiza na gato.

Dr Gatsinga yagize ati “Twumva tugomba gukurikiza amategeko. Iyo umuntu yishe amategeko ntagomba kuyakwicisha nawe. Ni ukuvuga ngo inama rusange twagize twiyemeje gukomeza kwakira Abanyarwanda nk’uko bisanzwe dukurikije ibiciro byatanzwe n’Inama ibishinzwe, ibya transfers n’ibiciro bitari byo ntituzabikurikiza. Izo za ’Top up’ turumva zitatureba kuko tugomba gutanga serivisi uwiyemeje kubarihira akayariha ubundi abivuza n’abishingizi bagakemura ibibazo byabo ariko twebwe tukaguma mu mategeko kugira ngo duhamane ubuganga bufite ireme”.

Yongeraho ati “Ntituzatesha agaciro serivisi zacu kubera ibibazo nk’ibyo, kandi n’umurwayi ntitugomba kumuhutaza. Umurwayi ntazaza ansanga ngo mubaze niba yabonye transfers. Hagati aho aguye mu nzira, sinzaba mbifiteho uruhare? Ubwo se icyo gihe nzitwaza ko nahawe amabwiriza n’umuntu waciye ku ruhande amategeko? urwo rubanza nzarukira?”

Dr. Nyirinkwaya ukuriye Ivuriro rya La Croix Du Sud na we avuga ko icyemezo n’ibiciro bya RSSB batazabishyira mu bikorwa.

Dr. Nyirinkwaya yagize ati “Igisubizo kiriho ku barwayi kiroroshye. Baziyizire iwacu tuzabavura nk’uko twari dusanzwe tubavura tutabasabye ibyo bya transfers n’ibindi. Sinavuga ko RSSB bikunda, iyo umuntu ashinze ikigo aba ashaka inyungu. Ariko ni byiza kumenya n’inyungu z’abo bakorana n’iz’abarwayi. Kandi ugakora ibintu utitwaje inyungu z’abarwayi kandi mu by’ukuri inyungu zabo zihagwa.”

Uyu muganga avuga ko yaba amavuriro yigenga ndetse n’abishingizi bose ari abafatanyabikorwa, akaba atari muri ubu buryo bakagombye gukorana.

Ati ”Si ko twakagombye gukorana. Ubundi abafatanyabikorwa baragenda bakicara ukamenya inyungu zawe n’iz’uwo mukorana ntihabeho guhangana. Abantu bakumvikana uko ibintu bigomba kugenda. Ari twebwe abaganga tutikanyiza, ariko n’abafatanyabikorwa bakagira ubushake bwo kubaka.”

Dr. Muyombano Antoine uhagarariye Polyclinique du Plateau avuga ko na we ivuriro rye rititeguye gushyira mu bikorwa icyemezo cya RSSB.

Dr. Muyombano yagize ati “Nk’uko bagenzi banjye babibabwiye, twe tugendera ku mategeko n’amabwiriza ashyirwaho n’Inama Nkuru y’Igihugu igena imiterere n’imikorere y’ibigo by’ubwishingizi mu gihe tugitegereje ko hari ikindi twakunguka mu gihe kizaza. Twe ntitwahutaza abatugana, umurwayi iyo aje ntagomba kujya muri ibyo bibazo bitanamureba. Twebwe ntidushyira imbere amafaranga. Yego dukeneye ubushobozi ariko ibyo biza nyuma. Amategeko ariho kandi u Rwanda ni igihugu kigendera ku mategeko, umuntu ntashobora gukora icyo ashaka cyose. Twebwe tuzakira umurwayi kandi ntahavunikire yishyura amafaranga atagombye kwishyuzwa, ibyo ntitwabyemera.”

Yongeraho ko amavuriro yigenga atagira uburyo bwa transfers, ngo muganga ashobora kuyitanga ku bushake, ariko mu mikorere rusange yagenwe na MINISANTE ibya transfers mu mavuriro yigenga ntibirimo.

Dr Muyombano ati “Mbere Umunyarwanda yabagaho kugeza ku myaka 49 none ubu tugeze kuri 66. None se ibyo byarikoze? Byakozwe n’uko imibereho myiza cyane cyane ubuvuzi bwateye imbere. Ntidushobora rero kubusubiza inyuma.”

Ubwo umukozi w’ikigo cya RSSB yasobanuraga iby’ibi byemezo n’ibiciro bishya byashyizwe ahagaragara mu itangazo, yabwiye Televiziyo y’u Rwanda ko babonaga bashobora guhomba mu gihe bakomeje kwishyurira 85% mu mavuriro yose nk’uko byari bisanzwe.

Uyu mukozi yavuze ko ngo barebye bagasanga bajya bishyura 105% by’amafaranga bakiriye mu mwaka, ikintu cyabajyana mu gihombo.