Yanditswe Friday , Tariki, 17 February 2017. saa 15:57:45 na Christophe Hitayezu

Ubushinjacyaba bukuru bwagaragaje ko kurigisa cyangwa kudatanga imisoro biteye impungenge mu Rwanda kurusha ruswa, kuko mu myaka itatu byatikiriyemo miliyari zirenga 16 z’amafaranga y’u Rwanda, no kubikurikirana bikaba bikigoye kubera amayeri bikoranwa.

Umushinjacyaha Mukuru wa Repubulika, Mutangana, yavuze ko mu myaka itatu [2013-2014, 2014-2015, 2015-2016], ubushinjacyaha bwakiriye amadosiye 827 yo kurigisa imari ya leta, 527 yo kurigisa amafaranga y’amakoperative, 138 yo kurigisa amafaranga y’amabanki n’amadosiye na 128 yo gutanga nabi amasoko ya leta binyuranyije n’amategeko.

Mu myaka itatu hagaragaye kunyereza amafaranga leta ishyira muri gahunda zigamije kuzamura abaturage aho muri Mutuelle de santé hanyerejwe 557 744 678 mu madosiye 31, VUP hanyerejwe 454 982 125 mu madosiye 49, Girinka aba 269 445 500 mu madosiye 25, Umurenge Sacco mu madosiye 30 angana na miliyoni 257 119 051.