Yanditswe Monday , Tariki, 6 February 2017. saa 20:56:00 na Christophe Hitayezu

Tiwonge Munthali, Nyampinga w’Umuco mu gihugu cya Malawi, aherutse kwamburwa iri kamba n’abashinzwe gutegura iri rushanwa muri iki gihugu ashinjwa imyitwarire mibi, ariko we yanze kuva ku izima yanga ko hagira umukobwa umusimbura.

Tiwonge Munthali yahawe ikamba rya Nyampinga w’umuco [Miss Heritage] 2016, kuwa Gatanu tariki ya 3 Gashyantare 2017 byaje gutangazwa ko aryambuwe ku mpamvu abategura Miss Malawi batasobanuye neza gusa ‘bemeje ko agomba gusimburwa n’undi mukobwa ufite indangagaciro nziza’.

Uyu Nyampinga akimara kubona iri tangazo rimwambura ikamba yavuze ko atigeze amenyeshwa impamvu nyamukuru zatumye aryamburwa ndetse ngo ntiyasobanuriwe ibyaha n’amakosa ashinjwa ku buryo yafashe umwanzuro wo kuzagumana ikamba.

Mu kiganiro yagiranye n’ikinyamakuru Nyasa Times, Tiwonge Munthali yemeje ko agifite ikamba mu rugo ndetse ngo yiteguye kuzaserukira Malawi muri Miss Heritage Global izaba muri Gashyantare 2017.

Yagize ati “Amategeko avuga ko Nyampinga yamburwa ikamba iyo atwite cyangwa iyo yijanditse mu bintu bitamuhesha agaciro. Muri ibyo bibiri nta na kimwe nakoze […] Ndakomeza nitegure kujya muri Gallagar, Midland muri Afurika y’Epfo.”

Aya marushanwa ya Nyampinga w’Umuco azaba kuwa 18 Gashyantare 2017, abere ahitwa Gallagher Estate, i Midrand, Johannesburg ho muri Afurika y’Epfo. Muri Miss Heritage Global u Rwanda ruzahagararirwa na Mutoni Jane wabaye Nyampinga w’Umuco muri Miss Rwanda ya 2016