Yanditswe Tuesday , Tariki, 28 February 2017. saa 19:22:12 na Christophe Hitayezu

Iradukunda Elsa ni umukobwa muremure w’inzobe ushinguye, ukunda guseka akagira amenyo yererana mu ishinya nziza y’umukara, aherutse gukora amateka akomeye agirwa Nyampinga w’u Rwanda umwaka wa 2017.

Yabyawe na Samuel Mana ufite ibiro by’ivunjisha mu Mujyi wa Kigali rwagati naho nyina akitwa Mukandekezi Christine akora akazi k’ubucuruzi, batuye mu Kagari ka Kanserege, mu Murenge wa Gikondo, mu Karere ka Kicukiro.

Iradukunda Elsa areshya na metero imwe na sentimetero 76 (1,76cm) akaba apima ibiro 50. Arasatira imyaka 19 y’amavuko kuko yavutse kuwa 25 Werurwe 1998, avuka mu muryango w’abana umunani [abakobwa batandatu n’abahungu babiri] akaba ari uwa kane.

Miss Rwanda 2017, Elsa Iradukunda akiri umwana muto [Foto: Igihe]

Mu ijoro rya taliki 25 Gashyantare 2017 Iradukunda Elsa yatorewe kuba Nyampinga uhiga abandi mu buranga n’ubuhanga. Yahawe ibihembo bikomeye birimo imodoka nziza ya Suzuki SX4 ifite agaciro ka miliyoni 15 z’amafaranga y’u Rwanda.

Mu gihe cy’umwaka azamarana ikamba azajya ahembwa umushahara w’amafaranga ibihumbi magana inani (800,000frw) bivuze ko ku mwaka azajya aba yahawe miliyoni icyenda n’ibihumbi Magana atandatu (9,600,000Rwf) hakiyongeraho n’ibindi bihembo bitandukanye.

Azahabwa ibindi bihembo birimo imyambaro igezweho, gukorerwa imisatsi buri kwezi, kogerezwa imodoka, gutemberezwa mu mahanga ya kure ndetse mu mpera z’umwaka wa 2017 azaserukira u Rwanda mu irushanwa ry’ubwiza rya Miss World.

Iradukunda Elsa avuga adategwa indimi eshatu, Igifaransa, Icyongereza n’Ikinyarwanda. Yari ahagarariye Intara y’u Burengerazuba, ntiyashyirwaga mu majwi y’abashoboraga gutsinda gusa ngo ‘mu mutima we yiyumvagamo gusoza irushanwa ahesheje ishema umuryango’.

Yavuze ko yatangiye kwiyumvamo ubushobozi bwo kuzaba Nyampinga akiri muto gusa yafashe umwanzuro ko agomba kuziyamamaza mu mwaka wa 2013 ubwo yari mu mwaka wa gatatu w’amashuri yisumbuye.

Umushinga yifuza gukora mu gihe azamarana ikamba rya Nyampinga w’u Rwanda ngo ‘ni ugufasha leta guha ingufu gahunda ya Made in Rwanda’ no guteza imbere ba rwiyemezamarimo bafite ibikorwa byihariye bishyigikira umurongo arimo.

Miss Rwanda 2017, Elsa Iradukunda n’ibisonga bye [Foto: The New Times]

Dore Ikiganiro kirambuye yagiranye n’umunyamakuru wa Igihe dukesha iyi nkuru

Umunyamakuru: Ni gute wakwibwira umuntu utakuzi neza?

Elsa: Nitwa Iradukunda Elsa, ndi Umunyarwandakazi utuye mu Mujyi wa Kigali i Gikondo. Ndi umwana uvuka mu muryango w’abana umunani, nkaba ndi uwa kane. Nize amashuri abanza muri Le Petit Prince ayisumbuye mperutse kuyarangiriza muri King David Academy mu ishami ry’Amateka, Ubukungu n’Ubuvanganzo. Ubu ndi Nyampinga w’u Rwanda umwaka wa 2017.

Umunyamakuru: Kumva izina ryawe ritangajwe ko ubaye Nyampinga w’u Rwanda wumvise umerewe ute?

Elsa: Maze kumenya ko ari njyewe Nyampinga w’umwaka wa 2017, narishimye cyane, naranezerewe, byarandenze. Nashimiye Imana n’abanshyigikiye bose.

Umunyamakuru: Ubwo wahoberanaga na mama wawe bwa mbere wararize, yakubwiye iki?

Elsa: Mama ubwo yampoberaga maze gutsinda yarambwiye ko ‘Imana itabeshya kandi ko isohoje isezerano ryayo’. Ariya marira yari ay’ibyishimo, byari bishimishije cyane.

Umunyamakuru: Ese koko wari wifitemo icyizere cyo gutsinda cyangwa na we waratunguwe?

Elsa: Nari mfite icyizere ko ngomba kuzaba Nyampinga nubwo hatabura abantu baguca intege ariko ubundi nari mfite icyizere gihagije. Mu bo twari duhanganye nta n’umwe natinyaga, bose bari bashoboye ariko nkumva nta n’umwe unteye ubwoba.

Umunyamakuru: Mu mwiherero wateraga urwenya cyane, ubusanzwe ugira iyo mpano?

Elsa: Mu busanzwe njyewe ndi umuntu ukunda guseka, nkunda kuba ndi kumwe n’abantu benshi. Ntabwo nkunda kubona umuntu ubabaye, kubera ko ntakunda kubabara nageragezaga igishoboka ngo mare irungu bagenzi banjye kandi nkabashyira hamwe, nakundaga kuvuga ibintu nkabona barasetse, ntabwo ari impano nari nsanzwe nifitemo ariko bayimvumbuyemo muri boot camp[mu mwiherero].

Umunyamakuru: Ni iyihe mpano idasanzwe wifitemo abandi batari bazi?

Elsa: Mu mwiherero buri wese yagaragazaga icyo ashoboye, njyewe bambwiye ko bansanganye impano yo kwigana abantu, narebaga buri mukobwa ikintu akoze nkacyigana kandi kikagenda neza. nakundaga kwigana Kalimpinya, namwiganaga uko agenda bakabona mpindutse nka we neza.

Umunyamakuru: Ni iyihe nteruro ukunda gukoresha cyane mu byo uvuga?

Elsa: Interuro nkunda gukoresha igarukamo Yesu. Njyewe amagambo mvuga ahanini ntihaburamo ijambo Yesu, mu bintu mvuga byose ndigaruramo.

Umunyamakuru: Ukunda kuvuga ibyerekeye Imana, urasenga cyane?

Elsa: Nkunda gusenga nakuze ndi umwana ukunda gusenga kandi narabitojwe, ndabikunda cyane kandi n’ubu ndabikora. Ubusanzwe nsengera muri Restoration Church i Gikondo. Ndi umukirisitu usanzwe, nta kazi kadasanzwe mfite mu itorero.

Umunyamakuru: Ibyo kwiyumvamo kuba Nyampinga ubwo byaje gute ko numva wakuze utozwa gusenga?

Elsa: Nkiri umwana nakundaga kugenda nk’aba Miss, nakuze nkunda kwigana uko ba Miss bagenda, nahoraga mbwira abantu ko ngomba kuzaba Nyampinga none dore birabaye.

Umunyamakuru: Numvise ko ufite ubumenyi mu by’imideli, wabikoze ryari?

Elsa: Nigeze kwerekana imideli, ngitangira mu mwaka wa kane mu mashuri yisumbuye nibwo natangiye kwerekana iby’imideli, narabikomeje no mu mwaka wa gatanu ariko ndangije mu wa gatandatu nahise mbihagarika kuko nari ngiye kwitabira amarushanwa ya Miss Rwanda. Nabyo ni ibintu nakundaga cyane […] Sindamenya niba nzabikomeza, icyo ngomba kugitekerezaho.

Umunyamakuru: Ni iyihe ndangagaciro iruta izindi kuri wowe?

Elsa: Indangagaciro iruta izindi kuri njyewe ni ubupfura. Ubupfura bukubiyemo ibintu byose, iyo uri imfura uba wubaha abantu, uba wihesha agaciro.

Umunyamakuru: Ni ryari ufata umwanzuro wo kubeshya wabiteguye?

Elsa: Ubusanzwe ntabwo nkunda kubeshya, ntabwo njya mbishobora ariko biramutse bibaye ngombwa ko mbikora kugira ngo ndokore ubuzima bw’abandi cyangwa ubwanjye nabeshya.

Umunyamakuru: Ni ikihe kintu wanga urunuka kurusha ibindi?

Elsa: Mu bintu byose bibaho nanga uburyarya, nanga umuntu wandyarya kandi nanjye sinjya ngira uburyarya.

Umunyamakuru: Mu bantu bariho ku Isi, ni nde ufata nk’intwari?

Elsa: Umuntu mfata nk’intwari ni Minisitiri Louise Mushikiwabo, kuko ubona ko ari umugore ufite intego muri byose.

Umunyamakuru: Ni izihe ndangagaciro wifuza ku Banyarwandakazi?

Elsa: Indangagaciro nifuza kubona ku Banyarwandakazi harimo kwihesha agaciro, kwiyubaha nk’Umunyarwandakazi, kubaha Imana no kutitinya.

Umunyamakuru: Mu bantu bo ku Isi, ni nde ukunda kurusha abandi bose?

Elsa: Mu bantu bariho ku Isi bose nkunda mama wanjye kurusha abandi. Mama ni we muntu utajya unca intege na gato mu buzima bwanjye, iteka ahora ambwira ko nshoboye kandi hari byinshi nzageraho.

Umunyamakuru: Uhawe ubushobozi bwo kugira icyo uhindura mu Rwanda, wahera ku ki?

Elsa: Ndamutse mpawe ubushobozi ikintu naheraho mu guhindura nakora ibishoboka ngahindura imyumvire y’Abanyarwanda, nakora ibishoboka ngakora icyatuma Abanyarwanda tugira imyumvire myiza kandi tugakunda iby’iwacu.

Umunyamakuru: Numvise uvuga ko ukunda gusoma cyane, ni uwuhe mwanditsi w’ibitabo ukunda cyane?

Elsa: Umwanditsi nkunda cyane ni William Shakespeare wanditse inkuru ya Romeo and Juliet, ni umwanditsi ufite amateka akomeye, ibitabo bye binyura benshi. Muri Afurika nkunda umwanditsi wanditse igitabo cyitwa ‘African Child’, na we ndamukunda.

Umunyamakuru: Umushahara Cogebanque izaguhemba bwa mbere uzawukoresha iki?

Elsa: Umushahara wa mbere Cogebanque izampemba nzawushyira mu mushinga wanjye kugira ngo ukomere kurushaho, nzakoresha ibishoboka abadafite ubushobozi bakora ibintu bya Made in Rwanda batere imbere.

Umunyamakuru: Ko ukiri muto ni gute uzabasha gutunga ayo mafaranga yose, bikiyongeraho ko baguhaye imodoka. Ikindi wabaye icyamamare kandi uracyari muto cyane, ubwo uzabyitwaramo gute?

Elsa: Nzagerageza kubikoresha uko bikwiye, nzakomeza kuba njyewe, sinzigera nshaka guhinduka. Nzakomeza mbe Elsa ucisha make, utuje, nzakomeza niyambaze nyagasani kuko iyo uyisunze nta kintu utabasha kugeraho. Nzakomeza nsenge, nzakomeza mbeho ubuzima nabagamo, nta kizahinduka.

Umunyamakuru: Numvise abakobwa bose mwari kumwe bavuga ko nta mukunzi bagira, na we niko bimeze?

Elsa: Nta mukunzi mfite kandi ntabwo ari ikintu numva nshyize imbere cyane, Umunyamakuru nikigera akaza ntabwo bizaba ari iherezo ry’ubuzima, nabwo nataza ubuzima burakomeza, ntabwo ari iherezo.

Umunyamakuru: Urakoze cyane ku kiganiro tugiranye.

Elsa: Murakoze ndabashimiye.

Imodoka yahembwe iparitse iwabo mu rugo [Foto: Igihe]

Iwabo mu rugo [Foto: Igihe]

Iwabo wa Miss Elsa [Foto: Igihe]