Published Saturday , on 22 July 2017, 06:59:44 by Christophe Hitayezu

Umuyobozi w’Akarere ka Rubavu, Sinamenye Jeremie yatawe muri yombi n’inzego za Polisi azira kubangamira uburenganzira bw’abiyamamaza, mu matora y’umukuru w’igihugu ateganyijwe muri Kanama uyu mwaka.

Umuvugizi wa Polisi y’u Rwanda, ACP Theos Badege yavuze ko uburenganzira bw’abiyamamaza bungana kandi ko bugomba kubahirizwa, ubirenzeho ahanwa n’amategeko.

ACP Theos Badege yavuze ko ibikorwa byo kubangamira kwiyamamaza kwa bamwe mu bakandida nk’uko iperereza ry’ibanze ryatangiye ribigaragaza byabaye mu karere ka Rubavu, mu mirenge ya Nyamyumba na Kanama, mu karere ka Nyaruguru mu murenge wa Busanze, mu karere ka Nyagatare mu murenge wa Rwimiyaga ndetse no mu karere ka Kirehe, mu murenge wa Gahara.

Yagize ati” Mu kugenzura ko ayo mategeko yubahirizwa, Polisi yafashe kandi ifunga by’agateganyo abayobozi 3 bakekwaho kwica no kubangamira ibikorwa byo kwiyamamaza kuri bamwe mu bakandida ; abo bakaba ari umuyobozi w’akarere ka Rubavu n’umwe mu bakozi ku rwego rw’ako karere ndetse n’umunyabanga nshingwabikorwa w’umurenge wa Busanze mu karere ka Nyaruguru.”

Akomeza agira ati:” Turifuza ko byumvikana neza ko buri muntu wese by’umwihariko abayobozi mu nzego zinyuranye n’ahantu hose , bafasha kubahiriza ayo mategeko n’amabwiriza agenga amatora no kwiyamamaza bityo abakandida bose bakagira amahirwe angana nk’uko bigenwa n’amategeko.”

Yanibukije kandi ko ubuzima bukomeza nk’uko bisanzwe; abakozi mu mirimo ya Leta, ibikorwa by’ubucuruzi, binakenewe cyane mugihe abantu baba bari mu ngendo bava cyangwa bajya kwamamaza.

Mu kiganiro Minisitiri w’Ubutegetsi bw’Igihugu, Francis Kaboneka yagiranye n’abayobozi b’intara, uturere twose tw’igihugu n’Umujyi wa Kigali kuri uyu wa 20 Nyakanga 2017, hifashishijwe ikoranabuhanga rya ‘video conference’, yabasabye gukora uko bashoboye ku buryo abiyamamaza bahabwa amahirwe angana, abaturage bakazihitiramo ubabereye.

Yagize ati “Abayobozi bareke abaturage bumve ibitekerezo by’abakandida batandukanye kugira ngo bagire amahirwe yo guhitamo icyo bifuza, uwo bazatora bashingiye ku bitekerezo bye. Nkaba naboneraho umwanya wo gusaba inzego z’ibanze ababikoraga mbasabe ko babihagarika, ariko nanasabe inzego zibishinzwe ko aho byagaragaye bakora iperereza, uwo bigaragayeho abe yabihanirwa.”

Ubwo umukandida wigenga, Philippe Mpayimana yiyamamazaga mu Karere ka Rubavu kuri uyu wa 20 Nyakanga, yabuze abitabira kumva imigabo n’imigambi ye mu mirenge imwe n’imwe bikekwa ko inzego z’ibanze zabigizemo uruhare.