Yanditswe Tuesday , Tariki, 14 March 2017. saa 20:15:34 na Igorora Iritararenga Dieudonne

Mu buzima bw’abashakanye habamo kurebana akana ko mu jisho, gusa hari ubwo umubano uzamo agatotsi bagakimbirana, bagashwana yemwe umwe agahunga mugenzi we agasubira aho yatobeye akondo, ibi babyita kwahukana, bidashyize cyera umugabo, agasubiza agatima impembero agashyira ubwenge ku gihe agashyira nzira ajya kugarura mu rugo uwo yihebeye, amuguyaguya, amusezeranya ko atazongera kumuhemukira.

Gusa mu minsi ya none ibi ntibigikunze kubaho, uwadusabye kumugishiriza inama ngo we yarahukanye, gusa ngo arabona gucyurwa bigenda biba cya cyizere kiraza amasinde, arasaba inama y’uko yabigenza.

Yatwandikiye agira ati ’’Ndabasuhuje, ndi umugore ufitanye n’umugabo wanjye umwana umwe w’imyaka 5, naje gukimbirana n’umugabo wanjye bidakabije gusa kubera ya ngeso abagore twigiramo yo gukunda kwingingwa twemere, narirakaje mbona umugabo ntacyo yibwira bikarushaho kumbabaza, nyuma ndikawusha ndataha nzi ko ahita ankurikira aza kuncyura gusa ubanza ndimo gutegereza ibitazaba.

Mu by’ukuri, umugabo wanjye yarankundaga pe, gusa nkakunda kumubabaza bya hato na hato, kuko n’ayo makimbirane ntabeshye ni njye wayakuruye, gusa nihagararaho, ubu se yaba amaze kundambirwa?.

Ngarutse inyuma ubu hagiye gushira ukwezi ataje kuncyura, ndamuhamagara gusa we ntajya anampamagara cyangwa ngo anyoherereze ubutumwa, aranyitaba neza akanganiriza n’umutima mwiza gusa nkumva aramfata nk’inshuti isanzwe, bikarangiza mutonganyije nivumbuye ngo numve ko hari icyo yibwira, ariko byahe byo kajya, nanagerageje kuneka niba hari undi bafitanye agakungu nsanga ntawe uhari nk’uko yabinyibwiriye.

Ubu rero nashobewe pe, kandi mfite isoni n’ikimwaro by’aho nahera nsaba imbabazi kuko nabwiye iwacu ko yari amereye nabi, bambwira ko nzasubira yo ari uko aje kuncyura bakanamuca amande, ubu se koko ndamuheka mu ki, ko numvise nta gahunda yo kuza kundeba afite. Ese nyonyombe nsubireyo, ndindire se akandi kanya gato umutima uzamukomanga ansesekareho, mumfashe rwose mungire inama.’’