Yanditswe Friday , Tariki, 10 February 2017. saa 19:45:48 na Christophe Hitayezu

Minisiteri y’Ubuzima muri Uganda yatanze icyifuzo ko gahunda zo kuboneza urubyaro zajya zigera no ku bana kuva ku myaka 10 mu rwego rwo kugabanya inda zititeguwe mu bangavu.
 
Uburyo busanzwe bukoreshwa mu kuboneza urubyaro burimo gukoresha udukingirizo, ibinini, inshinge n’ubundi buzajya bukoreshwa.
 
Iyi Minisiteri irasaba ko iyi serivisi yajya itangwa ku bigo nderabuzima n’ahandi hose hatangirwa serivisi z’ubuzima hatitawe ku myaka y’uyihabwa , igitsina, ubushobozi bwo kwishyura, icyiciro cy’amashuri, kuba ari ingaragu cyangwa yarashatse, aho atuye cyangwa ubwoko bwe.
 
By’umwihariko iyi gahunda bifuza ko yahera muri za Kaminuza, amashuri abanza n’ayisumbuye, ibigo by’amadini, amahuriro n’ibigo by’urubyiruko.
 
Mu itangazo ryashyizwe ahagaragara n’iyi minisiteri rikubiyemo amabwiriza riragira riti “Hakenewe imbaraga nyinshi ku gushaka uburyo abangavu n’abasore bareka gukora imibonano mpuzabitsina bakiri bato no kongera uburyo bwo kuboneza urubyaro mu rubyiruko. Abangavu n’ingimbi bose bemerewe guhabwa serivisi zo kuboneza urubyaro, gusobanurirwa no guhabwa ubwo buryo ku bana bari hagati y’imyaka 10 na 24.”
 
Umuvugizi wa Minisiteri y’ubuzima Vivian Nakaliika yavuze ko iyi gahunda yari yatangijwe mu minsi ishize ariko isa nk’iyavuguruwe.
 
Amategeko ya Minisiteri y’uburezi, ateganya ko umwana atangira amashuri abanza ku myaka 6, bivuze ko utasibiye azajya atangira guhabwa serivisi zo kuboneza urubyaro ageze mu mwaka wa gatanu.
 
Imiryango iharamira uburenganzira bwa muntu n’abarezi ntibabishyigikiye
 
Daily Monitor ivuga ko imwe mu miryango irengera uburenganzira bwa muntu yishyize hamwe n’irengera umuryango isaba ababyeyi kwanga iki cyemezo. Ivuga ko kwaba ari ugushyigikira ibikorwa by’imibonano mpuzabitsina.
 
Mr James Tweheyo, umuyobozi w’ ihuriro ry’abarezi, Uganda National Teachers’ Union (Unatu) yavuze ko abana bakwiye gutozwa umuco mwiza basaba Leta kurinda abana ibikorwa nk’ibyo.
 
Yagize ati “Turashaka ko uburenganzira bw’abana bacu burengerwa, ibintu n’amabwiriza bigahabwa abo bigenewe. Leta ntikwiye guteshuka ku nshingano zayo kubera inyungu za bamwe. Ntidukwiye kuyobywa n’inkunga z’abifitiye inyungu zabo.”
 
Nubwo Uganda ifata ingamba nyinshi zo guteza imbere ubuzima bw’umwana, abangavu, n’abakuru, ni kimwe mu bihugu 10 bya mbere bifite umubare munini w’abana bavuka benshi kikanagira umubare uri hejuru w’abana bapfa bakiri bato.
 
Umwaka ushize, ibigo by’amashuri bisaga 100 byigishije mu buryo butemewe ibikorwa biganisha ku mibonano mpuzabitsina. Aho bavugaga ko kwikinisha cyangwa ubutinganyi bishobora gukorwa mu kwimara ipfa ry’imibonano mpuzabitsina ku barimu n’abanyeshuri bigamije kugabanya umubare w’abana batwita n’abashaka bakiri bato.
 
Ibi ariko byaje kwamaganwa na Perezida Museveni, imiryango iharanira uburenganzira bwa muntu n’ubw’abana ndetse na Minisiteri y’Uburezi.