Yanditswe Monday , Tariki, 2 October 2017. saa 00:00:34 na Christophe Hitayezu

Kuri iki cyumweru tariki ya mbere Ukwakira 2017, ikipe y’akarere ka Gisagara ya volleyball yashyikirijwe igikombe cya shampiyona yegukanye tariki 16 Nzeri 2017 nyuma yo gutsinda Kirehe umukino wa kabiri amaseti 3-1 i Nyakarambi.

Ubwo yakinaga uyu mukino, ikipe ya Gisagara yinjiye mu mukino neza ndetse iza no kwegukana iseti ya mbere, ku manota 25 kuri 20 ya Kirehe. Ibi byaje no gukomeza mu iseti ya kabiri; Gisagara ibifashijwemo n’ ubunararibonye bwo kudakora amakosa menshi mu kibuga, yaje kwegukana n’ iyi seti, ku manota 25 kuri 20 ya Kirehe nabwo.

Iseti ya gatatu, ikipe ya Kirehe yongeyemo ingufu iza no kuyegukana ku manota 26 kuri 24 ya Gisagara.

Iseti ya kane yagombaga kwerekana niba umukino uza gukomeza ku iseti ya gatanu mu gihe Kirehe yaba iyitsinze, cyangwa se Gisagara igatwara igikombe iramutse iyegukanye, byaje kurangira Gisagara iyitsinze ku manota 25 kuri 23 ya kirehe ihita yizera kwegukana igikombe cya shampiyona cy’umwaka wa 2017 mu bagabo.

Iki ni igikombe cyabo cya mbere begukanye mu mwaka wabo wa mbere bari baje no muri shampiyona. Bagishikirijwe nyuma y’imikino y’irushanwa rya Carre d’ AS rihuza amakipe yasoje shampiyona ari mu myanya ine ya mbere ryabereye i Kigali. Mu bagore iki gikombe cya shampiyona cyegukanywe n’ikipe ya Rwanda Revenue Authority nayo ikaba yagishyikirijwe.

Reba amafoto y’abakonnyi n’abafana b’ikipe ya Gisagara bishimira igikombe